Հայրս հանքային ջրի սիրահար է, և որքան ինձ հիշում եմ, մեր սեղանից անպակաս է Ջերմուկի Մայր գործարանի արտադրության հանքային ջուրը: Իսկ «Բջնին էլ վատ Ջերմուկ չի» ժամանակին հայտնի անեկդոտն ինձ համար էր, քանի որ ես, հանքային ջուր ասելով, միայն «Ջերմուկ» էի հասկանում, ու ինձ համար անհասկանալի և անընդունելի էին մյուս բոլոր հանքային ջրերը:
Չնայած ունեցածս խիստ վերաբերմունքին, երբեք չեմ հասկացել, թե ինչով են հանքային ջրերը տարբերվում իրարից (մանավանդ միևնույն վայրում արտադրվող), մինչև չտեսա սեփական աչքովս: Հիմա արդեն կարծիքս հիմնավորված է: Ուրեմն ....
Այս տարի որոշեցինք մեր հանգիստն անցկացնել հայրենիքում, և ընտրեցինք Ջերմուկը: Հանգստի ժամանակ էլ հնարավորություն ստացանք այցելել «Ջերմուկ» հանքային ջրի Մայր գործարան և ներսից ծանոթանալ արտադրության ու հանքային ջրի ստացման ողջ գործընթացին: Քանի որ էքսկուրսավարը գործարանի աշխատակիցն ու հայրիկիս մանկության ընկերն էր, ապա վստահաբար կարող եմ ասել, որ ստացել ենք հավաստի ու առանց չափազանցությունների տեղեկատվություն:
Այսպես` նախ մեզ ցույց տվեցին այն հանքավայրը, որտեղից գործարանը դուրս է բերում հանքային ջուրը: Բացատրեցին, թե բարձր ջերմաստիճանում գետնի տակից դուրս եկող ջուրը ինչպես և ինչ ճանապարհով է հասնում գործարան` սառը ջրի խողովակների միջով անցնելով` կորցնելով սկզբնական ջերմությունը: Ապա այն վայրերը, որտեղ ջուրը ֆիլտրվում է, սառեցվում և գազավորվում:
Անչափ գրավիչ էր շշալցման գործընթացը, երբ աչքիդ առաջ փոքրիկ մետաղապլաստե տարրան դառնում էր շիշ, լցվում ջրով, պիտակավորվում, փակվում, պիտանելիության ժամկետ ստանում ու փաթեթավորվում: Այստեղ մարդկային գործոնը միայն վերահսկումն իրականացնելու համար է, մնացած ամեն ինչը կատարում են ժամանակակից սարքավորումները:
Հիմա անցնեմ ամենագլխավորին: Ինչու՞մն է Մայր գործարանի առավելությունը:
Ի տարբերություն որոշ հանքային ջուր արտադրողների, այն վերցվում է մի հանքավայրից, որտեղից դուրս եկած ջուրն իրապես համապատասխանում է միջազգային չափանիշներին, առողջարար է և զերծ վնասակար տարրերից: Բացի այդ, Մայր գործարանը ջուրը գազավորում է դարձյալ հանքավայրից ստացած բնական գազով, այն պարագայում, երբ այլ ընկերություններ շատ հաճախ CO
2-ը ստանում են արհեստական ճանապարհով (հիմնականում ծխից): Մայր գործարանը հատուկ սարքով հանքավայրից վակումի միջոցով դուրս է բերում բնական գազը և համապատասխան խտությամբ նորից վերադարձնում ջրին:
Սակայն գովեստի արժանի այս ընկերության աշխատանքն ու արտադրանքը չի գովազդվում, ավելին` շատ ու շատ հանրախանութներում նույնիսկ չի վաճառվում: Պատճառը անշուշտ Հայաստանում իշխող տնտեսական մրցակցության «արդարացի» պայմաններն են, որոնց թելադրանքով հանքային ջրի ստացման իրական գործընթացն էլ աղավաղվում է ու ներկայացվում շատերին:
Այս բացահայտումից հետո ինձ համար պարզ դարձավ, թե ինչու՞ բուժող հանքային ջուրը ոչ մի օգուտ չի տալիս, և հասկանալի շատերի` «առաջվա ջուրն ուրիշ էր» դժգությունը: Հուսով եմ գրառումս կօգնի Ձեզ ևս ստանալ այդ հարցերի պատասխանն ու վստահ լինել, որ կա ընկերություն, որը 1951 թ-ից սկսած արտադրում է նույն որակյալ հանքային ջուրը:
Հ.Գ. - Որպեսզի հեշտությամբ տարբերեք իրական Ջերմուկը, տարրայի վրա փնտրեք տարբերանշանը` եղնիկի գլխով, կամ պարզապես ճշտեք` արդյո՞ք Ձեր գնածը հենց Մայր գործարանի արտադրությունն է:
