Իմ աշխարհը: May 2012

7 May 2012

Ոչինչ չի փոխվում

Երկնքում ճախրող ոստիկաններ,

Ոստիկանատիպ մուրացկաններ,

Մուրացկանակերպ անգույն դեմքեր,

Ու կերած-խմած ուրվականներ...

Բացուխուփ անող շատ բերաններ,

Ասես ափ նետած անթիվ ձկներ,

Հերթերում պատերազմող ձեռքեր,

Ո՞վ է այս ամենը հնարել...

Սա ի՞նչ հանելուկ է,

Սա շուտասելուկ է,

Չի լսվում ո՛չ ձայն, ո՛չ պատասխան:

Սա ի՞նչ հանելուկ է,

Սա շուտասելուկ է,

Ո՞վ է տեր աստվածն ով՝ սատանան...

Որովայնամիտ ու բութ դեմքեր,

Եվ անթիվ դատարկ որովայններ,

Բարքերի անկում, անկման բարքեր,

Եվ անկման եզրին կանգնած կարգեր...

Կուսականորեն շիկնած լրբեր

Կուշտ ու կուռ կերած խմած սրբեր,

Դզած-փչած ու կեղծ կույսեր,

Կույսերից հիասթափված հույսեր...

Սա մի կուսանոց է, թե՞ սա բոզանոց է,

Ասե՛ք, ձայնազուրկ իմաստուններ,

Ո՞ւր է անգլուխը, քաղաքագլուխը,

Որն ունի ոռի վրա ծալքեր...

Մտավորական քրեականներ,

Կիսագողական ոստիկաններ,

Ղումարի նստած դասախոսներ,

Ու նստած-հելած շատախոսներ...

Անգթությունից կոտրած սրտեր,

Ու գթաբաժան առաքյալներ,

Խորհրդարանում խորհող այրեր,

Ու նմանատիպ դեպքի վայրեր...

Իսկ կարգին տղերքը,

Ում ձեռքին է զենքը,

Մահվան հետ գիշեր են լուսացնում:

Իսկ ազգի տականքը,

Մեր ազգի թերանքը,

Թալանում է ազգը ու պղծում...

Գեներալատիպ մեծ գրողներ,

Գրողի տարած գեներալներ,

Գեներալամիտ նախարարներ,

Ու նմանատիպ տարբեր բաներ...

Նախագահական ընտրություններ,

Եվ անընտրելի նախագահներ,

Հալումաշ եղած անթիվ ստեր,

Ո՞վ է այս ամենը բեմադրել...

Ո՞վ է նստած վերը,

Դրա տիրու մերը,

Չի լսվում ո՛չ ձայն, ո՛չ պատասխան:

Ո՞րն է իրականը,

Տերն ու տիրականը,

Էս անտերուդուս անտերության...

Սա մի կուսանոց է, թե՞ սա բոզանոց է,

Ասե՛ք, ձայնազուրկ իմաստուններ,

Ո՞ւր է անգլուխը, քաղաքագլուխը,

Որն ունի ոռի վրա ծալքեր...

Ռուբեն Հախվերդյան «Նախագահական ընտրություններ»

6 May 2012

Որտե՞ղ է մեր ընտրելու իրավունքը

Հանրապետական ընտրությունների այս օրը, երբ ժամեր անց պարզ է դառնալու, թե որ քաղաքական ուժերով է կազմվելու Ազգային ժողովը, երբ պարզ է դառնալու, թե ովքեր են առաջիկա 5 տարիների ընթացքում ստանալու անձեռնմխալիության իրավունք, իրավունք` օրենքներ գրելու կամ եղածները փոփոխությունների ենթարկելու, ինչեր ասես որ չգրվեց: Գրեթե բոլոր լրատվամիջոցները արձանագրեցին ընտրախախտումների, ցնդող թանաքի, միջադեպերի ու կաշառքների մասին տեղեկությունները, հերքեցին կամ հաստատեցին այս կամ այն լուրը: Շատ քաղաքագետներ ու վերլուծաբաններ ուշադրության արժանացրին ընտրությանը մասնակցող քաղաքական ուժերի ու գործիչների հայտարարություններին, նախընտրական խոստումներին ու ծրագրերին կամ դրանց բացակայությանը, սակայն կարծես ոչ մեկին այլևս չհետաքրքրեց, որ խախտվում է ընտրողի տարրական իրավունքը:

Խոսքն այն մասին է, որ ի տարբերություն նախկինում գործող Ընտրական օրենսգրքում, ներկայումս օրենքով քվեաթերթիկներում բացակայում է «Բոլորին դեմ» տողը: Այդպիսով ստացվում է, որ չնայած ընտրողը ունի ընտրության իրավունք, բայց զրկված էր ընտրելու իրավունքից:

2 May 2012

Պոզիտիվ :)

Լավ նկարներ ստանալու համար պետք չէ լավ լուսանկարչական ապարատ: Այսպես սփոփում եմ ինքս ինձ, երբ երկար չարչարանքներից հետո իմ լավ, բայց ոչ պրոֆեսիոնալ լուսանկարչական ապարատով լավ լուսանկարներ եմ ստանում:

Ու քանի որ այսօր էլ արթնացել եմ լավատեսական նոտայով, դրա համար էլ կկիսվեմ իմ մի քանի լավ լուսանկարներով:

Հա, ի միջիայլոց, առաջին նախադասությունս նրա համար էր, որ շատ խիստ չդատեք ինձ` իմ շատ սիրելի պրոֆեսիոնալ լուսանկարիչ ընկերներ ու լուսանկարչությունից հասկացող իմ անկեղծ ընկերներ :))