Մաշտոցի այգու վերաբերյալ բոլոր փաստաթղթերն ուսումնասիրելուց հետո ճարտարապետ Սարհատ Պետրոսյանը հանգել է հետևյալ եզրահանգմանը. ա) քաղաքապետարանին հարող բոլոր կառույցները (գլխ. ճարտարարապետը և իր աշխատակազմը, քաղաքաշինության ու ճարտարապետության վարչությունը, ինչու ոչ նաև «Երևաննախագիծ» ինստիտուտը), որոնք պետք է թույլ չտային այս անհասկանալի ու ցայտուն հակաօրինական գործընթացը, զուրկ են իրենց պարտականությունները պատշաճ կատարելու կարողությունից, բ) Երևանի քաղաքապետարանը կարիք ունի բոլորովին նոր քաղաքաշինական քաղաքականության ու դրա համար անհրաժեշտ է ամբողջովին դադարեցնել ցանկացած շինարարական գործընթաց ու ժամանակ տալ բոլոր քաղաքաշինական գործընթացները վերանայելու համար, գ) ՀՀ օրենսդրության քաղաքաշինությանը վերաբերող ողջ բլոկը կարիք ունի վերանայման:
Այս առիթով HayNews.am-ը զրուցեց ճարտարապետի հետ` պարզելու, թե իր կատարած բացահայտումներն ի՞նչ օգուտ կարող են տալ Մաշտոցի այգու պահպանման համար պայքարողներին, և առհասարակ, ինչպե՞ս հարցը կարելի է լուծել:
- Ի՞նչ փաստաթղթերի մասին է խոսքը և ի՞նչն է վկայում պատասխանատու կառույցների անգործության մասին:
- Ակտիվիստները խնդրեցին ուսումնասիրել փաստաթղթերը` պարզելու, թե ինչ հիմքերով է այդ վայրում թույլատրվել կրպակների շինարարություն: Ուսումնասիրվել է Երևանի գլխավոր հատակագիծը, դրան առնթեր Գոտիավորման նախագիծը և Գլխավոր պողոտայի բարեկարգման նախագիծը: Երեք նախագծեր, որոնք մշակվել են քաղաքապետարանի պատվերով նույն` «Երևաննախագիծ» ինստիտուտի կողմից: Ուսումնասիրությունը ցույց տվեց, որ դրանցում ամրագրված բոլորը գաղափարները միմյանց հակասում են: Այսինքն` տեսականորեն քաղաքապետարանում աշխատող քաղաքաշինարարներն ու ճարտարապետները երբեք ուշադրություն չեն դարձրել, թե որ փուլում ինչ է նախատեսված եղել այդ տարածքի համար: Սա հստակ անփութության ապացույց է, ինչը նշանակում է, որ բոլոր ստորաբաժանումները, որոնք պետք է հետևեին այդ աշխատանքներին, վատ են կատարել իրենց աշխատանքը:
Ամբողջ խնդիրը կայանում է նրանում, որ Երևանի քաղաքապետին անհարմար դրության մեջ են գցել իր ղեկավարած կառույցի մեջ գործող ճարտարապետներն ու քաղաքաշինարարները: Այն թղթերը, որոնք ներկայացվում են, ոչ թե լուծում են խնդիրը, այլ նոր հարցեր են առաջացնում, որովհետև քաղաքաշինության տեսանկյունից կիսատ-պռատ անհասկանալի, զրոյական արժեք ունեցող փաստաթղթեր են ներկայացվում: Խնդիրը գնալով բարդանում է, և պետք է կանգ առնել ու հասկանալ, թե ովքեր են իրենց աշխատանքը վատ կատարել, քանի որ միայն քաղաքապետը չէ, որ պետք է այդ նախագծերի ամբողջական կամ ոչ ամբողջական լինելու մասին պատկերացում ունենա, նա խորհրդական ունի, ճարտարապետ ունի, գլխավոր ճարտարապետ ունի, ճարտարապետության վարչության պետ ունի, և այլն, և այլն:
- Այդ փաստաթղթերի ուսումնասիրությունների հետ կապված Դուք որևէ առաջարկ կամ վերլուծություն ներկայացնելու՞ եք համապատասխան մարմիններին:
- Ես անձամբ այս շարժման հետ որևէ առնչություն չունեմ, չնայած շատ ողջունում ու սատարում են նրանց, ես ակտիվիստների հետ չեմ խորհրդակցել և մենք չենք քննարկել նրանց հետագա քայլերը: Չնայած դրան` առկա վիճակը կարող է պատճառ հանդիսանալ, որ ոլորտի բոլոր պատասխանատուները պաշտոնազրկվեն, որովհետև իրենց պատճառով քաղաքական ֆիգուր Տարոն Մարգարյանը հայտնվել է բավականին խոցելի վիճակում, այն դեպքում, երբ նա վստահել է իր ստորադասներին, որոնք իրենց գործը շատ վատ են արել:
- Իսկ ի՞նչ եք կարծում, բնապահպան ակտիվիստների շարժումը դրական արդյունքի կհասնի՞:
- Միանշանակ արդյունքի կհասնի, և ենթադրում եմ, որ այն կլինի փոխզիջում: Գուցե ես սխալ եմ, բայց չեմ կարծում, թե առկա ամեն ինչը վերացնելը հարցի լուծումն է: Արդյունքը լինելու է ինչ-որ միջանկյալ լուծում. այն կարող է լինել փոխըմբռնման հուշագիր` քաղաքապետարանի և ակտիվիստների միջև, առ այն, որ այդ տաղավարների մի մասը այգում ժամանակավորապես ընդունելի են դառնում` պայմանով, որ 2 տարի հետո դրանք պետք է քանդվեն և այգին վերադարձվի նախկին վիճակին: Քաղաքաշինության մեջ պետք է լինի փոխզիջում և այդ փոխզիջմանը կարելի է հանգել, պարզապես պետք է ճիշտ ճանապարհային քարտեզ մշակել:
- Մաշտոցի այգուն հարակից կա գետնանցում, որտեղ առևտրի համար նախատեսված տաղավարները, կարելի է ասել, դատարկ են: Հնարավո՞ր է, որ կոնսենսուսը լինի այգուց կրպակների տեղափոխումը գետնանցում:
- Հնարավոր է: Այդ տարբերակը ես լուծում համարում եմ, բայց չեմ կարծում, որ ռեալ է, քանի որ այդ մարդկանց Աբովյան փողոցից` ամենաթանկ տեղից, հանելուց հետո, դժվար է պատկերացնել, որ տեղ կտան Մաշտոցի անցումի տակ:
- Այսինքն` քաղաքապետարանը պարտավո՞ր է համագործակցել նաև տնտեսվարողների հետ:
-Այո, մենք պետք է հասկանանք, որ քաղաքապետարանի խնդիրն է նաև տնտեսական շահավետությունը հաշվի առնելը, և կոնսենսուսը պետք է լինի ներդրողի, հասարկության ու քաղաքապետարանի մեջ:
Կարծում եմ, որ շատ լավ է, որ նման հարցեր են բարձրացվում նմանօրինակ դեպքերում, բայց կարծում եմ նաև, որ շատ կարևոր է, երբ պայքարողները, որոնց շարքում մի քանի անգամ ինքս էլ եմ հանդես եկել, հասկանան խնդրի բուն էություն, քանի որ այնպես չէ, որ եթե երկրում կրպակ են կառուցում, նախագահն է մեղավոր: Կան ինչ-ինչ կառույցներ, որ պատասխանատվություն են կրում, և ես որպես մասնագետ փորձում եմ երկու կողմին մատնանշել, թե խնդիրը որտեղ է: Ինձ թվում է, որ քաղաքապետ տարոն Մարգարյանը, որին ես հավատում եմ, և հավատում եմ, որ ինքը սիրում է այս քաղաքը, կհանգի փոխզիջման, որը կլինի այսօր, վաղը կամ մոտակա օրերին:
Լիլիթ Բունիաթյան
No comments:
Post a Comment