«Երեսբու՞ք», թե՞ «Պնդերես»

Եթե դուք էլ վերջ ի վերջո որոշել եք զարկ տալ «տեղական արտադրությանը» և «Ֆեյսբուք» սոցիալական ցանցի հետ համատեղ օգտվել նաև հայկական «Երեսբուք»-ից, ուրեմն ձեզ սպասում են նույն անակնկալներն ու փորձությունները, որոնց ես հանդիպեսցի իմ «զբոսաշրջության» 15 րոպեների ընթացքում:

Նախ, չսխալվեք, ու չմուտքագրվեք «Ֆեյսբուքի» միջոցով, քանի որ «Երեսբուքը» կվերցնի ձեր ֆեյսբուքյան գաղտնաբառը, ու... ու հուսով եմ ոչինչ էլ չի հասցնի անել: Հետո պաշտոնականի փոխարեն, ձեր գալուստն անմիջապես կողջունի Ջոնի Դեպի երեսով «simpomalchik»-ը, ով այնքան ակնհայտ «բոտ» (ծրագրային ռոբոտ) է, որ չի պատասխանի ձեր ոչ մի արձագանքին:

Որքան էլ փորձեք ձեր «Երեսը» հայերեն դարձնել, չեք կարող, որովհետև ցանկցած էջում կհայտնվի «Terms of Service»-ը, ու մինչև այստեղ-այնտեղ դեգերելուց հետո կգտնեք օգտագործման պայմանների հետ համաձայնելու կոճակը, կհայտնաբերեք, որ ոչ միայն այդ պայմանները, այլև էջերում առկա ինֆորմացիայի մեծ մասը թարգմանված չէ: Հավանաբար դա կայքի ստեղծողների որդեգրած քաղաքականությունն է, այլապես մինչև վերջ կթարգմաներին «Ֆեյսբուք» բառն ու մենք կունենայինք «Երեսգիրք»:

Ընկերներ բնականաբար չեք ունենա (ես ոչ մեկին չկարողացա գտնել), իսկ հիմնական էջում կտեսնեք «Ֆեյսբուքի» նորությունների մի մասը միայն: Մյուս էջերում առկա ինֆորմացիան նույնպես անգլերեն է,  դրա համար էլ այդ մասին չենք խոսի: Ինչ վերաբերում է կայքի արտաքին տեսքին, ապա այն հիշեցնում է ռուսական «Օդնոկլասսնիկի»-ն:

Երկրորդ անգամ կայք մուտք գործելու համար էլ, չգիտես ինչու՞, ստիպված եղա փոխել գաղտնաբառս: Այդքանից հետո եթե ձեր հայրենասիրությունն էլ է իմի չափ, ապա պետք է փնտրեք «պրոֆիլը» ջնջելու կոճակը:

Վերջում ինձ մնում է հույս փայփայել, որ մոտ ապագայում մեզ չեն հրամցնի, ասենք, «Կապի մեջ», «Ծլվլոց» կամ այլ «հայրենադարձված» սոցկայքեր ու այդ կայքերն էլ չեն գովազդվի Նազենի Հովհաննիսյանի կամ Քիմ Քարդաշյանի կողմից, թե չէ այս անգամ էլ հայրենասիրությունից բացի, այլ գայթակղիչ պայմաններ մեզ փորձության կտանեն: